Зошто Македонија застана зад резолуцијата на САД за Украина?

„Одлуките за спонзорирање и гласање за резолуциите на Генералното собрание на ОН немаат и не треба да бидат толкувани како повлекување или промена на претходно изразените позиции. Напротив, со нив Северна Македонија ја реафирмира цврстата поддршка за Украина и продолжува со осудата на агресијата на Руската Федерација“, е ставот на Министерството за надворешни работи (МНР), по информацијата дека земјата е коспонзор на предлог-резолуцијата на САД за Украина во која се користи помалку критичен јазик за руската инвазија, а не на предлогот којшто го поднесе ЕУ. 

„Солидарност со украинскиот народ“

Тоа во јавноста се толкуваше како „повлекување“ од досегашната политика и ставови коишто го имаше земјата во однос на инвазијата во Украина. Но, од МНР велат дека изразуваат силна солидарност и одговорност кон украинскиот народ и неговите напори за целосна заштита на територијалниот интегритет, суверенитетот, независноста, слободата и демократијата.

Според МНР, одлуките на Северна Македонија во поглед на поддршката и гласањето за резолуциите на Генералното собрание на Обединетите нации се донесени врз основа на темелно истражување и анализа на актуелните глобални надворешно-политички движења, утврдените позиции на влијателните меѓународни чинители, заложбата за зацврстување на мирот, безбедноста и просперитетот во светот, како и стратешкиот интерес на државата за создавање стабилна позиција и градење поцврсти односи со стратешките партнери.

„Заложбите на Трамп“

„Особено се земени предвид и актуелните силни заложби на претседателот на САД, Доналд Трамп и американската администрација за побрзо завршување на воените активности меѓу Украина и Руската Федерација преку водење ефективни и непосредни преговори, чија основна цел е што поскоро постигнување на траен мир и безбедност во Украина и поширокиот регион“, порачуваат од министерството, со коешто раководи Тимчо Муцунски. 

Објаснувањето на МНР следи откако премиерот Христијан Мицкоски на прес-конференција информираше дека е донесена одлука Македонија да биде коспонзор на предлог-резолуцијата на САД за Украина. „Очекувам таа да биде поддржана од мнозинството во рамките на Обединетите нации“, рече Мицкоски. 

Пред третата годишнина од инвазијата на Русија на Украина, САД предложија нацрт-резолуција на Обединетите нации. Предлогот, наводно, не ја именува експлицитно Москва како агресор, ниту пак повикува на повлекување на руските трупи од Украина. Коспонзори на американската резолуција се и Грузија, Унгарија и Израел. Резолуции на истата тема, но со построга реторика кон Русија, предложжија и Франција и Германија.