Нова фасада и прозорци во училиштето во Циглана

Подобрени се условите за учениците и наставниците во основното училиште во гостиварската населба Циглана. Објектот доби нова, енергетски ефикасна фасада, а извршена е и замена на прозорците. Денес во посета на училиштето беше градоначалникот на Гостивар, Арбен Таравари.

„Ова е уште една инвестиција во правец на заштеда на електрична енергија и опфаќа нова фасада и замена на прозорци. Се надевам дека наредната година ќе успееме да направиме уште некои зафати во ова училиште, ми кажаа дека водоводот треба да се среди и тоалетите иако практично не се во лоша состојба, но мислам дека треба да се направат како што ги средивме во другите училишта последните две години, со одредени стандарди и за деца со посебни потреби.“, рече градоначалникот.

Училиштето во Циглана функционира како подрачно на ОУ „Единство“ во Гостивар.

„Разликата после инвестициите е видлива, условите се многу подобрени. Секако во моментот кога ќе бидеме сите подготвени ќе има и нови инвестиции“, рече директорката на ОУ „Единство“, Реџије Мазлами Јусуфи.

Во училиштето во Циглана настава посетуваат 160 деца во пет паралелки на македонски јазик.