Со симулација на конститутивна седница на Собранието, Европскиот фронт кој го предводи ДУИ, ја почна кампањата за парламентарните избори.
Од коалицијата велат дека импровизираната седница е со цел да и се предочи на јавноста јасната визија за консензуална демократија, европска интеграција и зајакнување на еднаковоста во одлучувањето.
Како приоритети на коалицијата остануваат промени на Уставот, со вклучување на сите заедници и избор на претседател на државата во Собранието со двотретинско и Бадентерово мнозинство.
Од Европскиот фронт објаснуваат дека на овој начин тие ја презентираат својата програма и што би направиле кога би биле избрани како пратеници.
Коалицијата Европски фронт ја предводи ДУИ, а учествуваат и ДПА на Мендух Тачи, Европска демократска партија на Аријанит Хоџа и Народно движење на Скендер Реџепи Зејд, приврзаниците на Зијадин Села од Алијанса за Албанците, потоа Бошњачкиот демократски сојуз и други.
Тие ги повикаа гласачите да гласаат за како што велат голема победа на Европскиот фронт на изборите на 24 април и 8 мај.
Марија Дивитарова