Рускиот суд нареди заплена на 439,5 милиони долари од имотот на JPMorgan Chase, откако руската државна банка VTB поднесе тужба за „компензација за загуба“ против најголемата американска банка. Средствата се на сметки кои беа замрзнати по воведувањето на антируските санкции поради војната во Украина.
Судот нареди заплена на сите средства на сметките на JPMorgan во Русија, но не и на хартии од вредност и други средства, вклучувајќи го и доменот jpmorgan.ru. Одлуката е објавена во рускиот судски регистар во средата, пишува Фајненшл тајмс.
VTB поднесе тужба на 17 април. Следниот ден, JPMorgan Chase поднесе тужба против руската банка пред американскиот суд за да се спречи заплената, што се смета за прекршување на договорот меѓу двете банки за решавање на споровите во Њујорк. JP Morgan изјави дека законот не дозволува ВТБ да ги исплати средствата од замрзнатата сметка, за која тврдеше.
Одлуката на рускиот суд ги истакнува тешкотиите со кои се соочуваат американските банки, како што е JPMorgan, во исполнувањето на нивните ветувања за затворање на нивните операции во Русија по почетокот на војната во Украина во февруари 2022 година.
Кога JPMorgan и Goldman Sachs ги објавија плановите таа година да ги затворат нивните операции во Русија, што сочинуваше само мал дел од нивните глобални операции, експертите предупредија дека секое излегување може да потрае повеќе од една година. Други западни банки, вклучувајќи ги Ситигруп, италијанската Уникредит и австриската Рајфајзен Банк Интернешнл, продолжуваат да работат во Русија.