Шефот на бизнисот со вештачка интелигенција на „Google“ рече дека компанијата ќе потроши повеќе од 100 милијарди долари со текот на времето за развој на технологија за вештачка интелигенција, уште еден знак на трката што ја зафати Силиконската долина, пишува „Bloomberg“.
На конференцијата „TED“ во Ванкувер во понеделникот, извршниот директор на „Google DeepMind“, Демис Хасаби, беше прашан за потенцијалниот суперкомпјутер наречен „Stargate“ што го планираат „Microsoft“ и „OpenAI“ и го открија во статија во „The Information“ во минатиот месец.
„Не зборуваме за нашите специфики, но мислам дека со текот на времето инвестираме повеќе од тоа“, одговори Хасабис, не откривајќи детали за трошењето.
Исто така, рече дека „Alphabet“ има супериорна компјутерска моќ во однос на ривалите, вклучително и „Microsoft“. Хасабис беше ко-основач на „DeepMind“ во 2010-та година пред стартапот да биде купен од „Google“ пред една деценија.
„Тоа е една од причините зошто се здруживме со „Google“ во 2014-та година, бидејќи знаевме дека за да дојдеме до вештачката општа интелигенција (AGI) ќе ни требаат многу пресметки“, додава тој, мислејќи на точката во која машините ќе работат подобро од луѓето на широк спектар на задачи.
„Тоа се случи. А „Google“ имаше и има најмногу компјутери“, коментира тој.
Светскиот интерес генериран од „ChatGPT“ му покажа на Хасабис дека општеството е подготвено да ги прифати системите за вештачка интелигенција, вели тој, дури и ако тие сè уште не се доволно добри и склони на грешки.
