Американскиот претседател Доналд Трамп им кажа на членовите на неговиот кабинет дека тие се задолжени за намалување на бројот на вработени, а не за Илон Маск кој раководи со Одделот за владина ефикасност (DOGE), поради масовните отпуштања на федералните работници.
Трамп ова им го кажал на своите министри на состанокот на кој присуствувале повеќето членови на кабинетот, како и самиот Маск, кој на приватни средби со членови на Републиканската партија тврди дека не е виновен за масовните отпуштања кои предизвикаа гнев низ земјата, пишува американската агенција Асошиетед прес.
Маск, во разговорите со конгресмени кои се соочуваат со притисок од гласачите незадоволни од отпуштањата на илјадници федерални работници, вклучително и воени ветерани, рече дека одлуките за отпуштања ги носат поединечни федерални агенции.
„Не сакам да видам големи отпуштања каде што многу добри луѓе ќе ги загубат своите работни места. Сакам министрите да ги задржат добрите луѓе, а оние на кои не им оди добро, на кои не може да се смета, на кои не се појавуваат на работа и слични работи, тие луѓе можат да бидат отпуштени“, им рече Трамп на новинарите во Овалната соба.
„Ако министрите можат да ги спроведат отпуштањата, добро. А ако не го сторат тоа, тогаш Илон ќе го стори тоа“, рече Трамп.
Гневот на американската јавност поради Одделот за владина ефикасност е дополнително поттикнат од неизвесноста кој точно управува со него и какви овластувања всушност има. Трамп додаде дополнителна конфузија кога во говорот оваа недела рече дека DOGE е „воден“ од Маск.
Администрацијата на Трамп планира нови големи намалувања на бројот на вработени во федералната влада.
„Златното доба на Америка штотуку започна! Во изминатите шест недели, нашата администрација ги исполни своите ветувања како ниедна друга, секогаш ставајќи ја Америка на прво место! DOGE беше неверојатен успех, а сега кога мојот кабинет е поставен, им наложив на министрите и раководството да работат со DOGE за мерките за намалување на трошоците и кадровските прашања. Ние велиме „скалпел“, а не „секира“.
Само што имавме средба со повеќето министри, Илон и други, и беше многу позитивна средба. Многу е важно да се намали бројот на вработени на вистинското ниво, но подеднакво е важно да се задржат најдобрите и најпродуктивните луѓе. Овие состаноци ќе ги продолжиме на секои две недели додека не се заврши оваа многу важна работа. Односите меѓу сите во таа соба се извонредни. Сите сакаат да стигнат до истата цел, а тоа е, сосема едноставно, ДА ЈА НАПРАВИМЕ АМЕРИКАТА ПОВТОРНО ГОЛЕМА!“, напиша Трамп на својата социјална мрежа „Truth Social“.
