Бизнис
ХРВАТСКИТЕ КОМПАНИИ ЌЕ ГИ ЗАДРЖУВААТ ВРАБОТЕНИТЕ СО ЗГОЛЕМУВАЊЕ НА ПЛАТИТЕ
22.02.2025
Голем број хрватски работодавачи ќе ги зголемат платите на вработените и ќе продолжат да вработуваат нови работници, е заклучокот од полугодишното истражување на Manpower.
Според истражувањето, дури 76,35 отсто од работодавачите во Хрватска планираат да ги зголемат платите на своите вработени во првата половина на 2025 година.
Најчесто очекуваното зголемување на платите што го планираат 35 отсто од работодавачите се движи меѓу шест и десет отсто, додека 11 отсто од компаниите размислуваат за зголемување на платите од 11 до 20 отсто, пренесува „Пословни дневник“.
Компаниите првенствено сакаат да ги зголемат платите за да ги задржат своите вработени, што како главна причина го наведуваат 65,73 отсто од фирмите, додека 61,03 отсто сакаат платите да се прилагодат на инфлацијата.
Приближно една третина од компаниите во Хрватска, покрај зголемувањето на платите, ќе обезбедат и дополнителни бенефиции за работниците, како што се бонуси и субвенции за превоз, додека 63,06 отсто не предвидуваат значајни промени во тој сегмент.
Особено позитивни вести доаѓаат од секторот туризам и угостителство, каде над 84 отсто од анкетираните компании донекаде ќе ги зголемат платите, како и во градежништвото (87,5 отсто) и секторот телекомуникации, електроника и електротехника (71,43 отсто).
Дополнително, повеќе од 60 отсто од работодавачите во банкарството, финансиите, осигурувањето и секторите транспорт и логистика планираат да ги зголемат платите на вработените.
Побарувачката за работна сила во Хрватска е голема, па 61 процент од работодавачите очекуваат да вработат повеќе работници отколку да отпуштат работници.
Најбарани работници се во градежниот, производствениот и туристичкиот сектор, а 32 отсто од анкетираните компании планираат да ангажираат странски работници.
фото freepic