Познатата американска актерка Ен Хатавеј откри дека во раните 2000-ти, продуцентите на филмот во кој глуми ја замолиле да бакне десетина актери кои биле на аудиција да играат покрај неа, опишувајќи го искуството како одвратно.
Таа во интервју за „V Magazine“ изјави дека во тоа време било нормално да се бара од актерка да се бакнува со други актери за да се „тестира хемијата меѓу нив“.
„Тие рекоа: „Десетина момци доаѓаат денес, а вие ја добивте улогата, не сте возбудени да ги бакнете сите?“ И се прашував дали нешто не е во ред со мене, бидејќи не бев возбудена. Мислев како тоа звучи одвратно“, рече актерката.
Хатавеј, која доби Оскар за улогата во „Les Miserables“ и наскоро ќе ја гледаме во романтичната комедија „The Idea of You“, рече дека го прифатила барањето од страв дека реакцијата може да и ја загрози кариерата.
„Бев толку млада и ужасно свесна колку е лесно да изгубиш сè ако те етикетираат како тешка, па се преправав дека сум возбудена и го направив тоа. Тоа не беше игра на моќ, никој не се обидуваше да биде злобен. Тоа беше едноставно друго време, а сега знаеме за подобро“, истакна актерката.