Екипа на охридскиот Црвен крст учествуваше на ревијалниот натпревар по прва помош во Сутоморе, Црна Гора

Охрид, 20. април 2024 (ОХРИДПРЕС) – Во рамки на Меѓународната програма „Силна алка“ која ја спроведуваат организациите на Црвен крст Суботица, Крагуевац, Ужице од Србија, Требиње од Босна и Херцеговина, Бар од Црна Гора и Црвен крст Охрид, денес во Сутоморе, Црна Гора, во беспрекорна организација на Црвен крст Бар, се одржа ревијален натпревар по прва помош со учество на екипи од сите горенаведени организации на Црвен крст.

– Прекрасните домаќини од Црвен крст Бар ги спроведоа сите европски стандарди за организирање на натпревар по прва помош, а целта, меѓусебно запознавање, дружење и размена на знаења и искуства во пристап и третман на повреди помеѓу волонтерите на организациите на Црвен крст од регионот, беше реализирана на највисоко ниво, информираат од Црвен крст Охрид, кои на овој натпревар го претставуваше екипа по прва помош од 6 волонтери, кои полни со импресии, побогати со искуство и нови познанства се враќаат во Охрид.

Програмата „Силна алка“ и преку првата помош ја потврди својата целисходност и корисност во ширењето на хуманоста, солидарноста, толеранцијата.

Следната активност на организациите во „Силна алка“ е Меѓународниот аматерски младински театарски фестивал „Вдиши театар“, кој од 12-ти до 16-ти јуни 2024 ќе се одржи во Охрид, во организација на Црвен крст Охрид. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука