Експлозии погодија руска фабрика за челик по наводен напад со дрон. Во последните месеци има зголемување на нападите со беспилотни летала врз енергетската и воената инфраструктура во Русија, за што Москва често ја обвинува Украина. Сепак, Киев обично не презема одговорност за овие напади.

Игор Артамонов, регионалниот гувернер на Липек, изјави дека пожарот во главната фабрика на Новолипецк Стил (НЛМК) утринава, на околу 450 километри од границата на Русија и Украина, бил предизвикан од дрон. Но, Артамонов не го спомна конкретно Киев и додаде дека нема жртви.

Фабриката е примарен производствен капацитет на НЛМК и е специјализиран за рамен челик. Таа произведува 18 отсто од вкупното руско производство на челик. НЛМК е клучниот имот на Владимир Лисин, руски милијардер, третиот најбогат Русин на листата на Форбс минатата година.

Повикувајќи се на неименувани извори, украинскиот медиум ТСН објави дека централата била цел на Украинската служба за безбедност и Главната управа за разузнавање и дека пожарот предизвикал евакуација на работниците. Оттаму додаваат дека поради големите оштетувања, таа фабрика која до неодамна произведуваше суровини за нуклеарно оружје и балистички ракети, ќе биде долго време надвор од функција.

Руското Министерство за одбрана соопшти дека Русите собориле два дрона над регионот и пресретнале уште два во регионите Курск и Тула.

Ваквите напади се се почести во Русија. Претходно во февруари избувна пожар во фабриката Лукоил во Волгоград, Јужниот федерален округ на Русија. Неколку дена претходно, дрон предизвика експлозија во рафинеријата „Невски Мазут“ во Санкт Петербург.