Исклучување од сообраќај и казни во контроли во Гостивар и Тетово

Полициски службеници на СВР Тетово, вчера (26 март)  од 10 до 15 часот на тетовско-гостиварското подрачје спровеле акциска контрола, во рамките на која вкупно биле откриени и санкционирани 4 технички неисправни возила (ТЕ-3 и ГВ-1).

Три од нив имале неисправни сопирачки, а едно неисправни светлосни уреди. „Технички неисправните возила веднаш се исклучени од сообраќај и изготвени им се законски предвидените поднесоци со парични глоби од 400 евра во денарска противвредност.“, информира портпаролот на СВР Тетово, Марјан Јосифоски.

Покрај ова, од сообраќај биле исклучени и 3 возачи (ТЕ-1 и ГВ-2) кои управувале без положен возачи испит и валидна дозвола за тоа и еден со впишана забрана за управување. Во акцијата, исто така, санкциониран е и 31 возач (ТЕ-22 и ГВ-9) кој не користел сигурносен појас, 1 (ТЕ) кој не носел возачка дозвола, 13 (ТЕ) погрешно, односно непрописно паркирани возачи, односно возила, од кои 7 биле подигнати од тетовската „пајак-служба“. При контролата откриени и санкционирани се и 13 други видови сообраќајни прекршоци.

Од полицијата додаваат дека вакви и слични контролни активности планирани се и во наредниот период во функција на подобрување на вкупниот ред и безбедност на патиштата на подрачјето на СВР Тетово и пошироко.