Русија одржува дијалог и со Иран и со Израел, залагајќи се за брза деескалација во комуникацијата со двете земји, изјави портпаролот на Кремљ, Дмитриј Песков.
„Знаете дека Русија одржува близок контакт… Имаме многу конструктивен работен контакт со Техеран. Во конструктивен контакт сме и со Израел, рече тој.
„Имаме тековен дијалог, нагласувајќи ја потребата да се обезбеди деескалација што е можно поскоро. Ги повикуваме и сите земји од регионот на разумна воздржаност“, нагласи портпаролот на рускиот претседател.
Песков го спомена неодамнешниот телефонски разговор меѓу рускиот министер за надворешни работи Сергеј Лавров и неговиот ирански колега Хосеин Амир-Абдолахиан. „Рускиот претседател Владимир Путин исто така вчера имаше телефонски разговор со иранскиот претседател Ебрахим Раиси“, посочи тој.
Освен тоа, секретарот на Советот за безбедност на Русија, Николај Патрушев, телефонски разговарал со неговиот израелски колега Цачи Ханегби, додаде портпаролот на Кремљ.
Вечерта на 13 април, Иран лансираше беспилотни летала и проектили кон Израел како одговор на, како што рече, „повторените злосторства“, вклучително и нападот врз конзуларната канцеларија на иранската амбасада во Дамаск. Техеран соопшти дека нападот бил насочен кон воените објекти на Израел. Израелските одбранбени сили (ИДФ) тврдат дека пресретнале 99% од речиси 350 ирански проектили лансирани кон Израел, велејќи дека била предизвикана мала штета на воздухопловната база Неватим.
Иранското Министерство за надворешни работи соопшти дека Техеран не се обидува да ја ескалира ситуацијата на Блискиот исток, но е решен да одговори на какви било незаконски и ирационални дејствија против земјата.
