Според Мицкоски, резултатите од првиот круг на претседателските избори ќе значат многу во насока на тоа како ќе се движат работите помеѓу двата круга бидејќи, како што рече, „вториот круг е во исти ден како и парламентарните избори и резултатот од првиот круг претседателски избори во многу нешто ќе влијае и во самата кампања и во атмосферата помеѓу двата круга, но и на парламентарните избори на 8 мај“
Како што стојат сега бројките, очекувам во вториот круг од претседателските избори убедливо како прва да влезе професорката Гордана Силјановска-Давкова, а како втор, актуелниот претседател Стево Пендаровски. Очекувам разликата по првиот круг да биде поголема од 100 илјади гласа предност на Силјановска во однос на Пендаровски, изјави вечеерва во емисијата „Клан директ“ лидерот на ВМРО-ДПМНЕ, Христијан Мицкоски.
Според Мицкоски, резултатите од првиот круг на претседателските избори ќе значат многу во насока на тоа како ќе се движат работите помеѓу двата круга бидејќи, како што рече, „вториот круг е во исти ден како и парламентарните избори и резултатот од првиот круг претседателски избори во многу нешто ќе влијае и во самата кампања и во атмосферата помеѓу двата круга, но и на парламентарните избори на 8 мај“.
Мицкоски се осврна и на очекувањата од парламентарните избори кои ќе се одржат заедно со вториот круг од претседателските избори, на кои, исто така, очекува убедлива победа на неговата партија.
„Очекувам убедлива победа на ВМРО-ДПМНЕ без дилема. Ако изборите би се одржале следната недела, ние би се движеле помеѓу 53 и 56 пратеника. СДСМ би бил тука некаде околу 25, албанските политички партии би делеле некаде помеѓу 25 и 27 и останатото би било дел од портфолиото на ЗНАМ и Левица. Тоа е резултатот кој го очекувам доколку следната недела би имале избори“,
кажа Мицкоски.
Зборувајќи за руско влијание, тема која, како што рече, сакаат да ја наметнат оние кои сѐ уште се на власт, Мицкоски истакна дека партиите од власта со тоа мислат дека ќе добијат некој поен плус, „но никој не е толку наивен да верува во логиката на власта да мавтаат со една рака со знамињата на ЕУ, а со другата ја крадат државата“.
„На тој начин тие се обидуваат да направат поларизација со којашто ќе им се допаднат на некои центри на моќ коишто се надвор од Македонија, имајќи ја предвид агресијата којашто ја направи руската држава кон Украина и имајќи ја предвид перцепцијата и мислењето во јавноста светска кон којашто ние се стремиме, тука пред се мислам на Европската унија и САД и мислат дека на тој начин ќе добијат поен плус и дека додека крадат и додека ја уништуваат Македонија со едната рака, со другата рака ќе мавтаат со знаменцата на ЕУ и САД. Мислам дека веќе не е никој толку наивен да паѓа на овие евтини естрадни трикови“,
рече лидерот на ВМРО-ДПМНЕ.
Според него, темата за руско влијание е апстрактна бидејќи, историски гледано, руското влијание во Македонија можеби е најмало на Балканот, а граѓаните на Македонија ја гледаат нивната иднина во ЕУ и имаат направено најмногу од сите народи за да бидат дел од ЕУ.
„Граѓаните на Македонија направија можеби најмногу од сите народи во Источна Европа за да бидат дел од таа Европска Унија, а тоа што не сме таму, тоа е од сосема друга природа прашање. Најмногу поради оние непринципиелни блокади коишто ги имавме од нашите соседи, а потоа од криминалните политичари коишто досега ја водеа Македонија“,
посочи Мицкоски.