Саинц се врати и го предизвика Ферстапен, шампионот сепак ќе стартува прв и во Австралија

Карлос Саинц ја пропушти претходната трка во Формула 1 шампионатот, но враќањето го одбележи со одлични квалификации во Австралија, каде за малку испушти пол-позиција.

Пилотот на Ферари беше најбрз во првата и втората квалификациска сесија, но во решавачката не успеа да извози побрз круг од актуелниот шампион Макс Ферстапен.

Болидот на Ред Бул беше побрз за 0,27 секунди, со што Ферстапен стигна до нова пол-позиција, а од вториот ред ќе стартуваат Серхио Перез и Ландо Норис.

Шарл Леклер мора да се задоволи само со петтата позиција, додека зад него е Оскар Пјастри од Мекларен.

Луис Хамилтон не влегол ни во најдобрите десет и ќе стартува како единаесетти, додека Џорџ Расел ќе почне од седмата позиција.

Првата десетка ја заокружуваат Цунода, Строл и Алонсо.