Пет автомобили изгореа под Скопско кале
Пет автомобили изгореа попладнево под Скопско кале, на улицата Личеновски на поранешниот полигон за полагање возачки испити. Пожарот избувнал околу 13:30 часот, а огнените пламени се префрлиле од возило на возила и под закана биле и останатите автомобили во близина, како и околното зеленило.
За среќа повредени лица нема и причинета е само материјална штета. Пожарникарите по половина час успешно го изгаснале и локализирале пожарот.
Во гаснењето биле вклучени четири противпожарни возила и 13 пожарникари, а нивната интервенција спречила ширење на пожарот.
Од МВР ни рекоа дека веднаш биле упатени полициски екипи кои работат на утврдување за причините за истиот и дека по насока на Инспектор од СВР Скопје, биле повикани и сопствениците на возилата кои биле оставени на дивиот паркинг.
Засега официјални информации за тоа како настанал пожарот нема, а неофицијално причината за пожарот е запалена сува трева. Сопствениците кои дојдоа на местото ни рекоа дека само биле повикани од полицијата, и дека засега не знаат што би можела да биде причината за настанатиот пожар.
Љубиша Владимиров