Го слушам Ахмети како ме напаѓа на митинзи дека ќе сме ја однеле Македонија во Русија. Го разбирам дека има желба да се натпреварува со најсилниот – со ВМРО-ДПМНЕ и мене. Но, ќе изгуби во таа битка. Непријатно ќе бидат изненадени кога ќе видат како ќе има гласови за ВМРО-ДПМНЕ во чисти етнички албански средини – рече Мицкоски
Кога зборувам отворено за криминалот на првенците на ДУИ, тие ме обвинуваат дека сум антиалбанец, затоа што сум го обвинувал Ахмети дека неговиот мит на идеолог падна со првиот момент кога неговиот сват одлучи да вози „ролс ројс“ додека народот во Сарај, Чаир , Тетово, Гостивар едвај крпи крај со крај, кажа претседателот на ВМРО-ДПМНЕ и носител на листата во првата изборна единица, Христијан Мицкоски, на митинг во Сарај.
Тој порача и дека негова единствена цел е конечно да изгрее сонцето во Македонија и сите криминалци во политиката коишто се богатат на грбот на граѓаните, без разлика на нивната етничка и верска припадност, да одговараат за сето она што им го сториле. Ќе продолжам да се борам затоа што криминалот нема етничка припадност, рече Мицкоски.
Фото-Принтскрин
„Кога неговиот голобрад внук (на Ахмети) за неколку десетици милиони евра одлучи да купува трговски центар во центарот на Скопје, кога семејството на неговиот најблизок соработник Артан Груби одлучи да купува имоти низ градовите во Македонија за десетици милиони евра и кога го поставував прашањето од каде пари за сето тоа, тогаш ме обвинија дека сум антиалбанец. Мене тоа дополнително ме мотивира да продолжам да се борам против криминалците во политиката без разлика дали се Албанци, Македонци, Бошњаци, Турци, Роми, Власи или Срби“,
рече Мицкоски.
Тој во говорот ги спомна и пожарот во модуларната болница во Тетово, несреќата во Ласкарци и случајот со „Беса транс“ каде што загинаа, како што рече, и Албанци и Македонци. Поради пеколот и политичкото мочуриште кои ѝ ги донесоа на Македонија, дали сме се запрашале до кога ќе го трпиме овој „артаноиден цикличен хибриден режим“.
„Отворено да го прашам Блерим, градоначалникот на Сарај, што го врати повторно во скутот на Артан Груби кој до вчера јавно го критикуваше и велеше дека е криминалец – ако е кешот треба да каже од каде е и како го стекнавте? Зашто народот е сè посиромашен“,
додаде Мицкоски.
Мицкоски се осврна и на иселувањето. Селата се одамна празни, сега почнуваат и градовите да се празнат. Училиштата се затвораат зашто нема деца. Дали е тоа иднината која ја сакаме додека тие се богатат на грбот на народот? Мојот одговор е не. Доста е од луѓе кои нè делат и сеат омраза и нè поларизираат и нè прават антивакви и антитакви. Ние сме само антикриминалци. Ќе се борам за правда без разлика на етничка, па и политичка припадност, посочи Мицкоски.
„Го слушам Али Ахмети како ме напаѓа на митинзи дека ќе сме ја однеле Македонија во Русија. Го разбирам дека има желба да се натпреварува со најсилниот – со ВМРО-ДПМНЕ и мене. Но, ќе изгуби во таа битка. Повеќе од 20 години го лажеше народот и ги злоупотребуваше Албанците со романтични прашања кои немаат врска со подобар живот. Печалеше на нивниот грб. Доаѓа крајот на такви луѓе. Непријатно ќе бидат изненадени кога ќе видат како ќе има гласови за ВМРО-ДПМНЕ во чисти етнички албански средини“,
рече Мицкоски на митингот во Сарај.
Мицкоски посочи и дека има проекти од програмата на ВМРО-ДПМНЕ каде што е предвидено 250 милиони евра на годишно ниво да се вложат во општините.