ДПМНЕ само за два месеца покажа како мисли да ја практикува власта доколку ја добие, со сила – кажа портпаролот на СДСМ, Дарко Каевски, вечерва на вонредна прес-конференција
За владејачкиот СДСМ, денешното апсење на новинарот Фуркан Салиу е доказ дека ДПМНЕ го вратиле ВМРО-МВРО на најбезобразен начин. Портпаролот Дарко Каевски на вечерашнава вонредна прес-конференција пред полициската станица во Гази Баба апсењето го квалификува како брутален и недемократски чин и побара ослободување на новинарот.
„На сите им е јасно дека ова е обид за замолчување и заплашување, откако новинарот објави афера директно поврзана со ДПМНЕ. На чело на СВР Скопје и ЕБР се новопоставени началници од страна на Тошковски. Значи, началниците назначени од Тошковски и ДПМНЕ дале наредба за апсење на новинарот Салиу. Ова е загрозување на слободата, на демократијата, на слободата на говор, загарантирана со Устав. Директен, брутален притисок врз независните новинари, врз оние кои истражуваат и работата за јавниот интерес. ДПМНЕ само за два месеца покажа како мисли да ја практикува власта доколку ја добие, со сила“,
рече Каевски.
Полицијата попладнево соопшти дека новинарот Фуркан Салиу е еден од приведените за време на фудбалски натпревар во селото Средно Коњари поради напад врз полициски службеници.
Техничкиот министер за внатрешни работи Панче Тошковски побара политичките партии и новинарскиот еснаф да се воздржат од реакции оти тоа го смета за притисок врз полицијата која, според него, постапува неселективно.