Свет
„Њујорк тајмс“: ИСИС подготвува нов терористички напад во следните шест месеци
Американските власти тврдат дека нападот врз трговскиот центар „Крокус сити хол“ во Москва во петокот, 22 март, го извршила најнемилосрдната фракција на Исламската држава – Хорасан (ИСИС-К) и предупредуваат дека има способност и волја да ги нападнат американските и западните интереси во следните шест месеци, пишува „Њујорк тајмс“.
Весникот наведува дека шефот на Централната команда на американската војска, Мајкл Курила, на 21 март го предупредил комитетот на долниот дом на Конгресот дека ИСИС-К „има способност и волја да ги нападне интересите на САД и на Западот во следните шест месеци, речиси без предупредување“.
Брус Хофман, истражувач на тероризмот во Советот за меѓународни односи, ги отфрли тврдењата на Русија дека Украина стои зад терористичкиот напад во Москва и посочи дека тоа е „класичен начин на работа на ИСИС“.
Ова е нивни трет напад на концерт на северната хемисфера во изминатата деценија, вели Хофман и потсетува на нападот во Париз во 2015 година на театарот „Батаклан“ и на бомбашкиот напад во Манчестер во 2017 година на концертот на пејачката Аријана Гранде.
„ИСИС ја гаѓаше Русија во последните две години и често го критикува претседателот Владимир Путин“, рече експертот за антитероризам, Колин Кларк, додавајќи дека групата „го обвинува Кремљ дека има муслиманска крв на рацете мислејќи на интервенциите на Москва во Авганистан, Чеченија и Сирија“.
Тој додаде дека голем број членови на ИСИС се од Централна Азија и дека живеат и работат во Русија.
„Заканата од ИСИС останува главна грижа во борбата против тероризмот“, рече директорот на Националното разузнавање, Аврил Хејнс, и посочи дека најголемиот број глобални напади на ИСИС ги извршила групата ИСИС-К.
Групата ИСИС-К стана позната откако талибанците дојдоа на власт во Авганистан во 2021 година кога нејзин член, бомбаш самоубиец, уби 13 американски војници и 170 цивили.
Иако многу од нападите на групата беа успешно извршени во близина на границата со Пакистан, повеќето од нивните планови во Европа беа спречени со помош на западните разузнавачки служби.
Во јули 2023 година Холандија и Германија во заедничка операција уапсија седум Таџикистанци, Турци и Киргистанци поврзани со мрежата ИСИС-К, осомничени за планирање напади во Германија, според „Њујорк тајмс“.
„Досега ИСИС-К првенствено се потпираше на неискусни оперативци во Европа за да извршуваат напади во нејзино име“, рече директорката на Националниот центар за борба против тероризмот, Кристин Абизед.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп ја прифати поканата на Бајден за телевизиска дебата
Поранешниот американски претседател Доналд Трамп денеска ја прифати поканата на американскиот претседател Џозеф Бајден за телевизиска дебата, истакнувајќи дека се потребни повеќе од две дебати.
Трамп на својата социјална мрежа напиша дека е подготвен да дебатира со Бајден, истакнувајќи дека ќе биде неопходно да се одржат повеќе од двете предложени дебати, пренесува ABC News.
Бајден претходно денеска го покани Трамп да одржи две претседателски телевизиски дебати во јуни и септември, а подоцна на платформата Х напиша дека ја прифатил поканата на Си-Ен-Ен за дебата со Трамп на 27 јуни.
Малку подоцна тимот на Трамп соопшти дека и тој ја прифатил поканата на таа телевизија, пренесува CNN.
Свет
Во случај на подолго отсуство на Фицо, тој би бил заменет со еден од четворицата вицепремиери
Доколку словачкиот премиер Роберт Фицо, кој денеска беше застрелан, би отсуствувал подолго време, на негово место би дошол еден од четворицата потпретседатели на словачката влада, пишува словачкиот портал Деник Н.
Според Законот за надлежности, во тој случај би го застапувал вицепремиерот, кој го именува премиерот.
Како што се наведува, во Владата во моментов има четворица потпретседатели, од кои еден е министерот за одбрана Роберт Калињак (Смер), кој е во иста партија со Фицо.
Свет
Официјални лица ширум светот шокирани од атентатот на словачкиот премиер Роберт Фицо
Европските претставници го осудија денешниот атентат на словачкиот премиер Роберт Фицо и го изразија својот шок од нападот, во кој Фицо беше тешко повреден.
Претседателката на Словачка Зузана Чапутова најостро го осуди денешниот брутален и непромислен напад врз словачкиот премиер.
„Шокирана сум. Му посакувам на Роберт Фицо многу сила во овој критичен момент да се опорави од нападот“, рече таа на платформата X.