Милошевски, Авалон Продукција: Универзална сала изгоре од мака, се изеде самата себеси, 11 години Македонија и Град Скопје не се во состојба да направат едно саличе за 1500 луѓе

Соопштението на Авалон продукција во врска пожарот на Универзална сала, ви го пренесуваме во целост:

Универзална сала изгоре од мака, се изеде самата себеси… ја изеде туѓ 9 годишен срам!
Универзална сала (сала во која ние сме ги донеле Bryan Ferry, Diana Krall, David Sylvian, David Byrne, сме имале концерти со Тоше, Каролина, Владо, Ареа, Влатко, цела екс-ју естрада) изгоре од мака.
Ја изеде туѓиот срам. Народски речено – пукна од мака!
Срамот кој го немаат политичките елити овде.
Ова ,,елити” е циничен сарказам – бидејќи тие не се елити ниту во налудничав сон!
Како на друг начин да се објасни фактот дека од нејзиното затворање, до нејзиното потенцијално отворање: ЦЕЛИ 11 ГОДИНИ СЕ ДЕЛАТ ПЛАТИ НА ВРАБОТЕНИ, ПАУШАЛИ НА УПРАВЕН ОДБОР И СЕ ПЛАЌА КИРИЈА ЗА КАНЦЕЛАРИИ!
Со парите трошени во овие 11 години на горенаведеното, 1000 пати требаше да биде реновирана салата и истата да прави пари!
Ама, тие пари никој не ги дава од џеб. Ги дава Град Скопје од ваши и наши пари.
Ваков недомаќинлук е за Гинисова книга за шампиони во моронизам.
11 години Македонија и Град Скопје не се во состојба да направат едно саличе за 1500 луѓе! Да го реновираат де…
Модерно Дубаи е изградено за пола од тоа време.
Универзална сала е слика и прилика за тоа како се практикува политиката во Македонија.
Таа е искршеното во милион парчиња огледало на сите ние кои останавме овде… во кое се гледаме секој ден.
За крај: во политички маркетинг за изборни циклуси, од буџет на Македонија се потрошени 18.000.000 евра од затворањето на салата, до денес.
Тоа е се’ што треба да знаеме/знаете!
Бобан Милошески