Претседателот на Сојузот на Србите, Миодраг Линта, денеска изјави дека најостро го осудува злосторството од омраза што, како што тврди, било извршено од група бошњачки шовинисти во центарот на Сараево врз средношколците од Нови Сад. Тој додаде дека ова е еден во низата примери на антисрпска хистерија што доминира во Сараево.
Како што соопштија од Сојузот на Србите од регионот, синоќа пред Младинскиот театар во Сараево биле нападнати тројца млади момчиња и една девојка кои се на размена во тој град. Напаѓачите носеле маски и метални шипки со кои без никаква причина брутално ги претепале српските студенти.
„Злосторството од омраза врз студентите од Нови Сад е само еден во низата примери на антисрпска хистерија што доминира во Сараево, создадена првенствено од бошњачките политичари и медиуми. Младите Бошњаци растат мразејќи ги Србите затоа што секојдневно слушаат најбесрамни лаги за српската агресија, опсадата на Сараево и на Бошњаците“, рече Линта.
Тој нагласи дека властите во кантонот Сараево имаат обврска да ги уапсат одговорните и соодветно да ги казнат.
„Меѓутоа, шансите сите сторители да бидат идентификувани и строго казнети се мали, со оглед на фактот дека напади врз Србите во Сараево имало и претходно, но никој не е санкциониран. Ова ќе испрати јасна порака дека физичкото и вербалното насилство врз Србите е нешто сосема нормално, па дури и пожелно“, заклучува Линта, пренесува Тањуг.