Москва не ја зема при срце Резолуцијата на Европскиот парламент со која Русија се третира како држава која го поддржува тероризмот, бидејќи таа не е правно обврзувачка, изјави портпаролот на рускиот претседател Дмитриј Песков.
– Европскиот парламент е тип на организација која со задоволство својата работа ја заснова на емоции, на емотивен пристап и за нас не е тајна дека таму во последните години има малку љубов за нас – рече Песков, а пренесува Тас С.
Во опширното интервју за телевизијата „Русија 1“, на кое се повикува Тас С, тој истакнал дека ситуацијата во Европскиот парламент во моментов е таква што „русофобијата ги преплавува“ и додал дека емоциите се „променлива работа“.
– Денеска емоциите се русофобични, утре ќе биде нешто друго. И тогаш можеби ќе има појаснување – рекол Песков.
Тој додал дека Русија гледа „голем недостаток на професионализам во работата на Европскиот парламент“.