Актуелниот освојувач на Купот на Македонија, Алкалоид, и осми натпревар во ракометна Европа не знае за пораз и веќе е во полуфиналето на Европскиот куп на ЕХФ. Скопските „фармацевти“ ја забележаа и седмата победа оваа сезона во Европа, откако на домашен терен го совладаа романскиот претставник Минаур од Баја Маре со 32-25.
Првиот меч на гостински терен заврши 31-31, па на Алкалоид му одговараше било каква победа. Дека целта е пласман во полуфиналето и ништо помалку од тоа покажа и самиот почеток на мечот, кога избраниците на Кирил Лазаров отворија со 4-0, а потоа зголемија и на 8-2, за во финишот да дојдат и до највисоките +7, 17-10 и 18-11. На крајот првиот дел заврши во корист на Алкалоид од 18-12.
Во второто полувреме веќе се беше рутина, па македонскиот претставник не му дозволи на противникот ниту да се надева дека ќе дојде до позитивен резултат.
Александар Петковски со седум гола беше најефикасен, додека Марко Стојковиќ постигна пет. Противник на Алкалоид во полуфиналето од Европскиот куп ќе им биде составот на Рунар Сандефјорд од Норвешка, кој направи големо изненадување и го елиминираше грчки Олимпијакос.
