Работнички стигна до третата победа во Првата кошаркарска лига откако во 7. коло славеше на гостувањето кај Струмица со 84-92. Струмичани одлично му парираа на фаворизираниот противник, но пет минутниот пост во последната четвртина донесе двоцифрена предност за нашиот најтрофеен тим и трет триумф едно по друго.
Двата тима беа расположени во реализацијата на самото отварање на натпреварот, а и покрај тоа што домашниот состав ја превзема иницијативата и успеа да направи блага предност (15-10), не успеа да ја задржи истата по првата четвртина. За Работнички одговорија Џексон и Малешевиќ па со поените на Србинот скопскиот состав ја превзема предноста 20-21 по 10. минути игра. Струмица навремено ги консолидираше своите редови и не само што продолжи да му парира на фаворизираниот противник во втората четвртина, со серијата од 6-0 во последните минута и пол успеа минималниот заостаток (41-42) да го претвори во предност од 47-42 на полувремето.
Струмичани продолжија во ист ритам на отварањето на второто полувреме во кое преку Бесок стигнаа и до двоцифрена предност (52-42), но како што одминуваа минутите Работнички успеа да се врати во игра благодарение на Џексон и неговите осум поени. Нему му се приклучија и соиграчите во „црвено-бело“ па високата негатива се претвори во преднсот од 56-62. Крстевски и Стаменковиќ не дозволија двоцифрена предност, одиграа одлично до крајот на третата четвртина па во одлучувачките десет минути Работнички влезе со позитива од само еден поен (70-71). Во нив преовлада одбраната на скопскиот состав кој дозволи само еден поен за речиси пет минути игра, период во кој гостите стигнаа до двоцифрена предност (75-87) која беше преголем залак за „сино-белите“.
Српското дуо Крстајиќ-Стаменковиќ ја предводеше Струмица со 22 поени и 6 асистенции, односно 21 поен и 11 скока, додека дабл-дабл учинок од 23 поени и 11 скока за Работнички забележа Форте. Со 21 поен мечот го заврши Џексон, а 20 поени и 9 скока запиша Малешевиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА