Актуелниот пратеник од СДСМ и ексдиректор на Агенцијата за млади и спорт изрази сомнеж дека мотивите за ваквата постапка на Обвинителството се можеби злоупотреба на изборната кампања поради тоа што, како што вели, вештачењето е од 25 април годинава, односно ден по одржувањето на првиот круг од претседателските избори, а обвинителниот предлог е доставен три работни дена подоцна
Актуелниот пратеник од СДСМ и поранешен директор на Агенцијата за млади и спорт (АМС), Дарко Каевски, ги отфрли како неосновани и тенденциозни наводите на Обвинителството кое денеска информира оти поднело обвинителен предлог против 12 лица поради злоупотреба на службената положба и овластување. Меѓу дванаесеттемина се и актуелниот директор на АМС, Наумче Мојсовски, и ексдиректорот на Агенцијата, Каевски.
Каевски изрази сомнеж дека мотивите за ваквата постапка на Обвинителството се можеби злоупотреба на изборната кампања поради тоа што, како што вели, вештачењето кое е од 25 април годинава, односно ден по одржувањето на првиот круг од претседателските избори, а предлогот е доставен три работни дена подоцна.
Иницијативата по овој предмет до Јавното обвинителство претходниот состав на Антикорупциската комисија ја поднесе на почетокот на февруари минатата година поради сомневања дека директорот на Агенцијата и членовите на Централната комисија во 2020, 2021 и 2022 година, по пат на искористување на службената положба и несовесно работење, заобиколувајќи ги законските процедури, извршиле распределба на средства, со што го оштетиле буџетот на државата, но и лицата што имале законско право на вакви средства, а не им биле доделени.
Каевски е уверен дека во транспарентна и фер постапка ќе се докаже неговата невиност и додава:
„Ништо од ова нема основа и затоа што фактите покажуваат дека ниту сум можел, ниту сум влијаел, ниту сум поттикнувал кој било од Централната комисија. Особено што е именувана од друг орган надлежен по Закон, на владина седница. Дополнително, сите членови во своите изјави кажале дека не сум присуствувал на работа на комисијата, ниту сум давал сугестии. Сѐ е јасно. Во делот на надзорот, според тогашниот закон за спорт член 14е, извештајот се доставува до следната календарска година од добиените ваучери најдоцна до 15 јуни или во конкретниот случај тоа е до 15.6.2021 година, период во којшто јас не сум директор на АМС“,
пишува Каевски во објава на Фејсбук.