Кејт Мидлтон и принцот Вилијам „минуваат низ пекол“ за време на нејзината битка со ракот, вели нивната пријателка дизајнерка Амаја Ариета.
Ариета, која ги облече трите деца на кралската двојка, принцот Џорџ (10), принцезата Шарлот (9) и принцот Луис (6), рече дека е уништена од дијагнозата на принцезата од Велс.
„Моето срце е скршено во моментов, мислам дека минуваат низ пекол, се надевам дека ќе се вратат. Тоа е навистина лично“, изјави таа за „Телеграф“.
Да потсетиме дека обожавателите на кралската двојка забележале дека нешто не е во ред и почнале да погодуваат што е тоа, поради што принцезата морала да објави видео во кое отворено зборува за својата здравствена состојба.
„Во јануари направив голема операција на абдоменот во Лондон и тогаш се мислеше дека мојата состојба не е канцерогена. Операцијата беше успешна, но тестовите по операцијата покажаа дека ракот е присутен. Затоа, мојот медицински тим ме советуваше да одам на превентивна хемотерапија и сега сум во раните фази на тој третман“, рече Мидлтон.
Таа објасни дека не ја открила својата состојба порано на јавноста бидејќи таа и принцот Вилијам прво морале да им објаснат на децата што се случува.
„Како што им реков, добро сум и секој ден станувам посилна и се фокусирам на работи кои ќе ми помогнат да заздравам, во мојот ум, тело и дух“, додаде таа.