Македонија
Лукаревска од Велес: Tука сме, со вас сме, ние не бегаме ниту од одговорноста, ниту од народот, ниту од државата
Почитувани граѓани, верувам во вашата љубов кон државата, сакате да биде безбедна, а вашите животи побогати и посигурни. Заедно одиме кон таа цел. Ви ветувам, ќе дадаме сè од себе за да ги оправдаме вашите очекувања и верба во нас. Од минатото добро знаеме дека она што ќе го посееме сега, ќе го жнееме утре. Затоа мора да сме будни, затоа клучно е СДСМ да победи на изборите, зашто само кога СДСМ победува, победници се и државата и граѓаните. Ветивме живот во слобода и тоа најголемо ветување го исполнивме. Сега ви ветуваме ИДНИНА, предвидлива, спокојна, европска, рече носителката во третата изборна единица Сања Лкаревска, вечерва во Велес.
Лукаревска истакна дека е предизвик и чест да се биде носител на листа во третата изборна единица, зашто, верува во исправните политики на СДСМ, во чесноста и во љубовта на нивните членови кон државата и кон сите нејзини граѓани.
– Тука сме, со вас сме , ние не бегаме ниту од одговорноста, ниту од народот, ниту од државата. СДСМ бил, е и ќе биде со граѓаните секогаш, и во добро и во лошо. Затоа важно е СДСМ и после овие избори да продолжи да ја води Македонија таму каде што ни е местото на сите, на цела држава-после НАТО, влез во Европската унија. Како Македонци со македонски јазик, по исправниот пат. Убедена сум дека и Велес, и на 24 април и на 8 мај, ќе го направи најдобриот избор, за Стево Пендаровски и Социјал демократскиот сојуз на Македонија, рече Лукаревска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.
Македонија
Скопските и тетовските пожарникари гасеа три огнови на отворено, соопшти ЦУК
Во изминатото деноноќие Центарот за управување со кризи информира дека биле евидентирани три пожари на отворено.
Регионалниот ЦУК Скопје соопштил дека БППЗ на Град Скопје во изминатото деноноќие имала две помали интервенции поради запалено ѓубре и тоа на ул. „Ферид Заири“ во Општина Чаир и кај Езерото Треска во Општина Сарај.
Регионалниот ЦУК Тетово известил дека ТППЕ Тетово имала една помала интервенција поради запалена ниска вегетација кај село Чифлик во Општина Желино.
Центарот за управување со кризи соопшти дека изминатите 24 часа имало вкупно 1.491 повици на Единствениот повикувачки број за итни случаи 112. Од нив „реални“ повици биле 62,84 отсто, а 37,16 отсто биле за други потреби на граѓаните што не биле итни.
Кон полиција биле упатени 63,18 отсто, кон итната медицинска помош 29,09 проценти, кон пожарникарите 2,73 отсто, a кон АМСМ 1,36 отсто од повиците кон бројот 112.
Македонија
Силните дождови поплавија подруми и гаражи во Охрид
Локални дождови вчера и во текот на ноќта имаше на повеќе места во државата. Регионалниот Центар за управување со кризи (ЦУК) Охрид, известува дека се добиени пријави на граѓани за поплавување на подруми и гаража на две куќи на ул. „Стив Наумов“, во Охрид. Од страна на Општина Охрид е контактирано со ЈП „Нискоградба“ и ЈП „Колекторски систем“ дека колекторскиот систем не можел да ја прими во целост количината на вода која поради обилните врнежи од дожд, бидејќи во тој период на пороен дожд количината вода била голема. За кратко време состојбата е санирана.
Од ЦУК потсетуваат за голема внимателност при појава на локалните нагли метео промени и особена внимателност при грмежите и молњите, односно при силните електрични празнења. Препораките се да не се престојува на отворен простор и под осамени дрвја.
Потсетување има и за внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.