Огласи за платена обука и грантови за фирми

Агенцијата за вработување објави повик за фирми кои имаат потреба да обезбедат квалификувани работници преку обука. Како што стои во повикот, лицата кои ќе ја посетуваат обуката ќе добиваат по 11.000 денари месечен надоместок, со вклучено осигурување за инвалидност и телесно оштетување причинето со повреда на работа и професионална болест и данок на личен  доход за времетраењето на обуката, додека за спроведувачите на обуката ќе биде покриен трошок во висина до 30.000 денари за лице.

Обуката ќе ја спроведуваат верификувани спроведувачи на обука, согласно претходно верификувана програма од страна на Центарот за образование на возрасните и/или Министерство за образование и наука.

Работодавачот е должен да вработи најмалку 50% од лицата што успешно ја завршиле обуката со полно работно време во времетраење од најмалку 6 месеци.

Јавниот оглас ќе биде отворен до 30.11.2024 година, односно се до исполнување на предвидениот опфат на корисници.

Агенцијата за вработување објави и повик за приватни компании кои се подготвени да го поттикнат својот деловен развој преку создавање на нови работни места преку зелени инвестиции.

Финансиската поддршка за нови вработувања изнесува од минимум 250.000 денари до максимум 750.000 денари во зависност од бројот на одобрени вработувања и се доделува во вид на грант – неповратни средства наменети за финансирање на нови деловни инвестиции насочени кон транзиција кон зелена економија. Овој оглас е отворен до 29 март.