Во воена операција на Соединетите Американски Држави во средата загинаа познатиот оперативец на ИСИЛ Билал ал-Судани и десет членови на терористичката група во северна Сомалија, соопштија двајца високи претставници на администрацијата на Џо Бајден.
Американскиот секретар за одбрана Лојд Остин потврди дека Билал ал Судани е убиен.
– На 25 јануари, по наредба на претседателот, американската војска спроведе офанзивна операција во северна Сомалија која резултираше со смрт на голем број членови на ИСИЛ, вклучувајќи го и Билал ал-Судани, истакнат оперативец на ИСИЛ во Сомалија и клучен посредник за Глобалната мрежа на ИСИЛ.
Ал Судани беше одговорен за поттикнување на зголеменото присуство на ИСИЛ во Африка и за финансирање на операциите на групата низ светот, вклучително и во Авганистан, рече Остин.
Тој додаде дека во оваа операција не е повреден ниту еден цивил, а американската армија немала загуби. Операцијата е извршена за 24 часа.
Американските сили, според официјалниот претставник, биле подготвени да го заземат Ал Судани, но „одговорот на непријателските сили“ на крајот резултирал со негова смрт, пренесува Си-Ен-Ен.