Општо познато е дека прекумерното пиење алкохол може да доведе до бројни здравствени проблеми: висок крвен притисок, срцеви заболувања, дигестивни проблеми, заболување на црниот дроб…
Покрај прекумерното консумирање алкохол, постојат и други навики кои исто така можат да му наштетат на нашиот црн дроб, а некои од нив може и да нѐ изненадат. Лекарите издвоиле четири такви навики.
Лоша исхрана
Безалкохолната масна болест на црниот дроб (NAFLD) е релативно чест наод. Тоа понекогаш може да доведе до безалкохолен стеатохепатитис, цироза и откажување на црниот дроб, потенцијално фатална состојба, објаснува д-р Алисон Едвардс за Парад.
Тоа е поврзано со дијабетес и отпорност на инсулин, но добрата вест е дека со внимателно следење на нашата исхрана, честопати можеме да ја спречиме оваа прогресија ако ја фатиме рано. Премногу рафиниран шеќер може да доведе до заболување на црниот дроб, па затоа е важно да го ограничите внесот на газирани пијалоци, слатки и преработена храна.
Конзумирање на „детокс“ пијалоци
Повеќето од она што можеме да го направиме за да му помогнеме на црниот дроб да го одржува телото здраво е да јадеме здрава, целосна храна и да избегнуваме недокажани пијалоци за детоксикација. Иако повеќето можеби нема значително да му наштетат на нашиот црн дроб, тие едноставно не се потребни, објаснува д-р Едвардс.
Недостаток на спиење
Постојат податоци кои покажуваат дека OSA (опструктивна ноќна апнеја) всушност може да предизвика безалкохолна масна болест на црниот дроб. Се чини дека ова се случува врз основа на зголемено ниво на отпорност на инсулин или нерамнотежа на липидите (како што се LDL и HDL холестеролот) и триглицеридите, според психологот специјализиран за истражување и едукација за спиење, д-р Мајкл Бреус.
Ако пациентот со „OSA“ има и метаболички синдром и дебелина, ова може да го влоши „NAFLD“. Недостатокот на сон може да предизвика отпорност на инсулин, што доведува до дисфункција на црниот дроб, додава д-р Бреус.
Игнорирање на етикетите и непочитување на упатствата на пакувањата на производите
Важно е да се читаат етикетите за производите што се продаваат без рецепт. Неколку производи што се продаваат како лекови без рецепт или како додатоци во исхраната, како што се витамин А, одредени екстракти од зелен чај и други кои се продаваат како диететски помагала, всушност можат да му наштетат на црниот дроб ако не се земаат според упатствата на пакувањето, заклучува д-р Едвардс.
