Конференција за активно граѓанство „КритикУМ“

На 26 јануари од 11:00 до 15:30 часот во Јавна соба во Скопје, ќе се одржи националната конференција за активно граѓанство „КритикУМ“.

Конференцијата за активно граѓанство „КритикУМ“ претставува простор којшто ги обединува граѓанските активист(к)и, младите, луѓето коишто се загрижени за состојбите во државата, независните уметници, едукатор(к)и, но и воопшто граѓаните што имаат некаков порив за промена.

Првото издание на конференцијата „КритикУМ“ ќе биде отворено со перформансот „Ритамот на нашиот отпор“. Овој перформанс претставува комбинација на музика, танц и социјално ангажиран текст. Триото составено од Бисера Ѓуровска, Никола Игновски и Ива Георгива ќе донесе неколку позначајни протестни говори од поновата историја во нашата држава низ движење, танц и читање на протестни говори.

Првиот тематски панел „Менување на локалните заедници преку грасрут активизам“ ќе отвори дискусија за вклученоста на локалните граѓански активистки во менувањето на своите заедници преку заедничарење, солидарност, вмрежување и меѓусебна поддршка.

Вториот панел „Ослободување на заробеното: Како граѓаните да си ги вратат јавните простори?“ ќе ги истражи начините на коишто активисти и граѓани дејствуваат кон ослободување на јавниот простор и давање на некаква друга, похумана и граѓанска димензија на простори коишто треба да им припаѓаат на граѓаните.

На конференцијата ќе биде промовиран и прирачникот за активно граѓанство што го издава Здружението за едукативен развој Еквалис. Авторка на прирачникот е м-р Сара Миленковска. Прирачникот за активно граѓанство го креиравме со цел да им помогне на идните граѓански и младински активисти и активистки во опремување со вештини и промислување на пристапите кон дејствување за општествено горливите проблеми.