„Иако денес ситуацијата е стабилна, им препорачувам да се пријават во амбасадата, да ги има во списокот со телефонски броеви и ако утре се влоши состојбата ќе знаеме како да ги контактираме. Тоа е најдобриот начин, да направиме список за тие што се надвор од државата“, рече Османи
Османи упати порака до Израел да не донесе одлука да возврати на нападот бидејќи, како што рече, спиралата на конфликти тогаш само ќе се влоши
Еден македонски граѓанин побарал да биде евакуиран од Израел, информира денеска министерот за надворешни работи Бујар Османи. Тој вели дека македонскиот граѓанин се пријавил во Амбасадата во Израел каде што веднаш му бил издаден патен лист за да може да ја напушти државата.
Од преостанатите македонски граѓани, за кои вчера министерот информира дека се меѓу 40 и 50, до денеска никој друг не побарал да биде евакуиран.
Османи рече дека единствено на СОС-телефонот во Скопје се јавиле од една компанија од каде што информирале за четворица вработени што се во Израел. Од компанијата, како што рече Османи, нагласиле дека Министерството треба да ги има предвид овие луѓе доколку се влоши состојбата и оставиле телефонски броеви на кои може да ги контактираат ако има потреба да бидат извлечени од Израел.
„Семејствата и на амбасадор и на дипломатот се таму. Вчера размислувавме и му дадов и насока на амбасадорот децата барем да ги пушти во Скопје и му дадов дозвола за тоа, меѓутоа утринава разговарав уште еднаш и бидејќи училиштата повторно се отворени и во моментот ситуацијата е стабилна сепак решиле да останат и да ја следат состојбата. Во секој случај ние сме подготвени, кризниот штаб е подготвен, постојано добива информации што ми ги пренесува и се координраме во текот на денот како да постапиме“,
рече Османи на денешната прес-конференција.
Во однос на информациите дека студенти од Јордан барале да се вратат во земјава, Османи рече дека вчера имало такви повици, но бидејќи состојбата денеска е сè уште статус кво, во очекување дали ќе продолжат нападите на Иран, дали ќе има возвраќање од Израел, во моментов, како што рече, нема некој притисок или барање од други држави во Блискиот Исток за евакуација. Во секој случај, рече Османи, ние сме спремни да се организираме веднаш.
Според него, единствен начин да знаат колку македонски граѓани има на Блискиот Исток е тие самите да се пријават во амбасадите за, како што рече, да ги планираме за ако ситуацијата излезе од контрола.
„Иако денес ситуацијата е стабилна, им препорачувам да се пријават во амбасадата, да ги има во списокот со телефонски броеви и ако утре се влоши состојбата ќе знаеме како да ги контактираме. Тоа е најдобриот начин да направиме список за тие што се надвор од државата“,
рече Османи повторувајќи дека покрај амбасадата во Тел Авив, на граѓаните на располагање им стојат и амбасадите во Каиро, Абу Даби и Катар.
Османи рече дека сите државјани може да бидат во комуникација со нашата амбасада во Тел Авив на дежурниот телефон: 972 549 267 378, како и на СОС-дежурните телефони на МНР: 075 273 732 и 075 268 376.
Тој нагласи и дека денеска имал разговори со повеќето амбасадори во регионот на Блискиот Исток, но и со амбасадорот на НАТО и други партнерски земји и додаде дека во моментов состојбата е делумно стабилизирана, училиштата во Израел се пуштени во функција, воениот кабинет се уште нема одлука дали ќе возврати.
Османи упати порака до Израел да не донесе одлука да возврати на нападот бидејќи, како што рече, спиралата на конфликти тогаш само ќе се влоши.
Османи вчера побара од претседателот на државата да го свика Советот за безбедност во поширок состав со учество и на опозициските политички партии бидејќи, како што рече, една помасовна ескалација на Блискиот Исток и покрај сите безбедносни реперкусии кои може да ги има, може да предизвика и бран бегалци.
Од кабинетот на шефот на државата, пак, информираа дека претседателот е во постојана комуникација со партнерите во НАТО и оти состојбата се следи внимателно. Во моментов, како што рекоа, се проценува дека нема безбедносна закана за Северна Македонија, а доколку се донесе одлука за свикување на седница на Советот за безбедност, јавноста ќе биде навремено информирана.