Приватните специјализанти јавно се оградуваат од каква било политичка поврзаност и мотивираност и велат дека единствениот мотив за штрајкот им бил тоа што биле доведени до работ на егзистенција
Поради пациентите, сензитивноста на периодот и отежнатата работа на клиниките, приватните специјализанти денеска информираа дека привремено ќе го стават во мирување генералниот штрајк. Сепак тие, како што потенцираа, секој вторник за време на паузата ќе се собираат во паркот пред интерните клиники за да ги потсетат надлежните дека нивните барања чекаат разрешница.
Приватните специјализанти јавно се оградуваат од каква било политичка поврзаност и мотивираност и велат дека единствениот мотив за штрајкот им бил тоа што биле доведени до работ на егзистенција.
Доктор Христина Илиоска-Чешлароска, приватен специјализант по интерна медицина, упати порака во името на своите колеги дека нема да се отстапат додека не се решат нивните барања и дека веднаш по изборите ќе побараат решавање на проблемите.
„Во знак на изразување на револт што нашите барања се уште не се прифатени, приватните специјализанти од следната недела, секој вторник за време на својата пауза, во 11 часот ќе се собираат во паркот пред интерните клиники, со цел да покажеме дека сме тука, постоиме и чекаме да се решат нашите проблеми“,
рече Илиоска-Чешлароска изразувајќи благодарност до колегите државни специјализанти и специјалисти кои им даваат поддршка.
И претседателката на Здружението на лекари специјализанти доктор Александра Георгиева нагласи дека ставањето на штрајкот во времено мирување никако не значи откажување од било кое барање.
„Се надеваме дека веднаш по завршување на изборниот процес и формирање на новата Влада, сите барања ќе бидат решени – здравствено осигурување, плата на ниво на просечен лекар и вработување на сите колеги кои се на специјализација“,
рече Георгиева.
Според неа, податоците покажуваат дека над 70 проценти од студентите на Медицинскиот факултет активно учат германски јазик, што според неа не е случајно. Според статистиките на Македонското лекарско друштво, над 250 лекари секоја година ја напуштаат државата што е еднакво на бројот на студенти што се запишуваат на Медицинскиот факултети.
Владата на седница во вторникот донесе одлука статусот на приватните специјализанти да се решава по изборите со предлог-законски решенија со кои ќе се предвидат нивните севкупни права и одговорности.
Приватните специјализанти бараат покачување на надоместокот кој во моментов изнесува 26 илјади денари и бараат тој да биде на ниво на просечна плата на доктор во јавна здравствена установа. Исто така, бараат здравствено осигурување и решавање на нивниот статус кој во моментов, како што рекоа, е невработени лица без здравствено и пензиско осигурување со договор на дело.
Министерот за здравство Илир Демири на првиот ден од штрајкот кажа дека ги поддржува барањата на приватните специјализанти за зголемување на надоместокот што го земаат месечно, како и за тоа дека треба да добијат здравствено осигурување, но, сепак, од нив побара трпение да поминат изборите, па потоа да ги решаваат проблемите.
Тој за штрајкот рече и дека има политичка заднина, за што доби одговор од приватните специјализанти дека тие немаат книшка од ниту една политичка партија.
Приватните специјализанти го продолжија штрајкот – чекаат одлука од денешната владина седница