Обединетите нации (ОН) тврдат дека израелски тенк нападнал јасно означено возило на ОН, убивајќи едно високо безбедносно лице на ОН од Индија и повредувајќи друго од Јордан.
„Обединетите нации немаат сомнеж дека муниција од израелскиот тенк погодила заден дел на бело возило на ОН на пат кон Европската болница во јужниот град Рафа во Газа“, изјави Фархан Хак, заменик портпарол на ОН, пренесува АП.
Хак пред новинарите откри дека секторот за безбедност на ОН, кој ги ангажирал двете лица, формирал панел за утврдување на фактите за да се разјаснат и расчистат околностите за инцидентот.
Израелските одбранбени сили (ИДФ) претходно соопштија дека двајцата минувале низ подрачје каде се воделе борби и укажаа на проблеми во воспоставување на комуникациски врски.
„Прелиминарната истрага укажува дека возилото е погодено на подрачје што е прогласено за активна борбена зона“, соопшти ИДФ, тврдејќи дека „не им била предочена рутата на возилото“.