Скоро четири месеци облекувале мантили и работеле со пациенти на Токсикологија, а немале никаков договор за работа.

Ова е утврдено во вонредниот инспекциски надзор на ДСЗИ по добиена претставка од вработени на Клиниката. Инспекторите констатирале дека 11 лица незаконски, а дел и без соодветно образование вршеле здравствена дејност.

„Издадено е решение да се преземат следните мерки. Здравствени услуги на Клиниката да се укажуваат од страна на здравствени работници, соработници кои имаат важечки договори, здравствени услуги да се укажуваат од здравствени работници кои имаат соодветно образование согласно закон. Медицинскиот и организацискиот директор да ги извршуваат непречено обврските од самостојна, а особено заедничка надлежност“, изјави д-р Рената Младеновска, директор на ДСЗИ.

Овие недостатоци Клиниката има рок да ги поправи за 5 дена. Но, токму ангажманот на договорците беа една од причините да ескалираат несогласувањата меѓу медицинскиот и организацискиот директор. А револт искажаа и од стручниот колегиум кои потенцираа дека на Токсикологија работат лица без никаков договор и несоодветно образование.

Вчерашната најава за разрешување на медицинскиот директор д-р Данил Петровски очигледно беше само закана, бидејќи денеска на прашањето дали е потпишано решението од министерството не добивме конкретен одговор.

Во целиот хаос на токсикологија и обидот да биде заменет резултат за урина со наркотици со чист примерок министертвото воопшто не ги зема во предвид реакциите на поголемиот дел вработените за однесувањето на организациската директорка Бесија Иљази. Тие посочија дека ниту комуницирала бидејќи не знаела македонски, и не почитувала одлуки на стручниот колегиум. И на вчерашната прес конференција зборуваше само на албански јазик.