Досега 44 компании од земјава се впишани во евиденцијата за економски оператори кои имаат пристап до НАТО-пазарот. Петровска ги охрабри и другите фирми да аплицираат во Министерството за одбрана за нивна регистрација
Министерката за одбрана Славјанка Петровска денеска ја посети штипската фирма „Актива“, која од февруари е сертифицирана за да може да конкурира и да учествува во тендери на НАТО-пазарот. „Актива“ е една од 44. компании во државата кои добиваат пристап до пазарите на НАТО.
„Особено ми е задоволство и сум воодушевена од она што денеска го видов во производствените капацитети на оваа компанија и ми е чест што од 28 февруари оваа компанија е сертифицирана и може да учествува на НАТО-пазарот“,
изјави Петровска.
Таа посочи дека уште на почетокот на март имало успешна средба меѓу претставници на агенцијата на НАТО за набавки и македонските компании, каде што била презентирана можноста како нашите фирми можат да учествуваат на тендерите на НАТО, што, според неа, е одлична шанса за развој на македонската економија.
„Првиот чекор што компаниите го направија е веќе завршен, а тоа е процесот на регистрација, односно верификација од страна на Министерството за одбрана – дека тие имаат способност и ги исполнуваат условите да настапат на НАТО-пазарот“,
кажа Петровска и посочи дека наш претставник ќе биде испратен во агенцијата на НАТО за набавки.
Иле Николов, сопственикот на „Актива“ – фирма која се занимава со автомобилска и метална индустрија, посочи дека со сертификатот ќе им се отвори една нова визија во нивнaтa производна програма, затоа што ќе можат да учествуваат и да се докажат на голем пазар. Тој вели дека покрај нивите досегашни партнери од Западот како ,,Ван Хол“, компанијата е подготвена да работи и со партнери од НАТО-пазарот.
„Се надеваме дека со овој машински парк и со оваа инфраструктура што ја имаме овде ќе бидеме подготвени да учествуваме на сериозни тендери, за да добиеме сериозни нарачки и од овој потенцијален инвеститор мислиме дека ќе можеме да ги исполниме навремено сите тие нарачки и нормално да бидат квалитетни согласно стандардите кои се бараат од НАТО-пазарот“,
кажа Николов.
Инаку, меѓу 44. компании што добиле ваков сертификат има фирми од различни сектори како градежништво, прехранбена индустрија, услуги во делот на организација на настани, транспорт, компании кои се занимаваат со трговија на нафта и нафтени деривати итн.
Петровска ги охрабри и другите компании да аплицираат во Министерството за одбрана за нивна регистрација на НАТО-пазарот.