Турскиот претседател Реџеп Таип Ердоган денес му кажа на својот сириски колега Ахмед ал-Шара дека Анкара ќе продолжи со дипломатските напори за укинување на меѓународните санкции за Сирија, јавува Анадолу.

Средбата меѓу Ердоган и Ал-Шара се одржа на маргините на Форумот за дипломатија во Анталија.

„За време на средбата, претседателот Ердоган рече дека Туркије го поздравува фактот што на оние кои сакаат повторно да се случи хаос во Сирија не им се дава можност и нагласи дека следните години ќе бидат години на стабилност, просперитет и мир во Сирија“, се вели во соопштението на Директоратот за комуникации при турското Претседателство.

Тој ја истакна и важноста од зголемување на напорите за ревитализација на комерцијалната и економската соработка со Сирија и додаде дека може да се разгледаат чекори и во други области.

„Претседателот Ердоган истакна дека Туркије ќе продолжи да ги поддржува напорите за стабилизација на Сирија, исто како што правеше досега“, се додава.

Тридневниот форум, што започна денес во турскиот туристички град Анталија, е фокусиран на темата „Враќање на дипломатијата во фрагментиран свет“.

Настанот ги обединува глобалните лидери, креатори на политики и експертите со цел справување со критичните глобални предизвици, како геополитичките тензии, нееднаквоста, насилството и климатските промени, воедно истражувајќи начини преку кои дипломатијата може да ја врати стабилноста и да се поттикне меѓународната соработка.