Првата катна гаража во Штип е дивоградба, која се гради позади Центарот за култура „Ацо Шопов“ тврди директорот на оваа културна институција Горан Трајков.
Свиркачи од Општина Штип му ја доставиле документацијата со која што, какошто вели се потврдува дека е издадено одобрение за градба на катна гаража спротивно на Законот за градење. Трајков денеска ја достави документацијата до СВР-Штип и бара да се испита случајот.
- Градоначалникот заедно со неговите вработени постапиле спротивно од член 61 од Законот за градење, со што го прекршиле членот 59 од истиот закон, каде што во член 61 децидно стои дека, доколку надлежниот орган издаде одобрение за градење спортивно на овој Закон, односно, не го одбие барањето за одобрение за градење слогласно членот 59, одгворното, односно службеното лице, во конкретниот случај градоначалникот на општина Штип, подлежат на кривична одговорност согласно Кривичниот законик- изјави Горан Трајков, директор на Дом на култура „Ацо Шопов“-Штип.
Штипскиот градоначалник, Иван Јорданов на обвинувањата одговори дека секој има легитимно право да излезе во јавност и да се сомнева во некоја незаконитост. Според него во изградбата на првата катна гаража во Штип нема ништо незаконско и е градена согласно законот.
- Катната гаража е објект којшто согласно Законот е изграден, поставен и којшто ќе биде во функција на граѓаните. Надлежните институции можат до проверат и да утврдат доколку има нешто незаконско- изјави Иван Јорданов, градоначалник на Штип.
Изградбата на првата катна гаража почна и завршува со обвинувања и прес-конференции меѓу Трајков и Јорданов. Трите катни гаражи во центарот на Штип треба да го средат сообраќајниот хаос во централното градско подрачје.
Викторија Јованова Димитрова