За легендарниот автомобил од „нашите“ краишта – Југо, веќе пишувавме. Тогаш со вас споделивме една доста објективна видео анализа на феноменот „Југо“ од перспектива на странец, авторот на каналот Биг Кар. Истото видео го преведовме на македонски јазик и го замоливме авторот на видеото да го додаде нашиот превод.
Гаражата на Џеј Лено: Откривање на Yugo GVS со Џеф Данам
Овој пат со вас споделуваме ново видео од „Гаражата на Џеј Лено“ (Jay Leno’s Garage) со Џеф Данам. Џеј Лено, по неговото пензионирање од The Tonight Show, се посвети на неговата вистинска пасија – автомобилите. Во оваа веб и телевизиска серии за моторни возила, Џеј Лено ги оценува автомобилите и мотоциклите. Епизодата за Југо GVS, за разлика од претходното видео за југовците кое го споделивме со вас, не е баш пофална, но е интересна да се изгледа.
Зад сцената: Предизвиците на Yugo GVS
Како што Џеф Данам потенцира Југо GVS се соочи со предизвици во квалитетот на производството, со одредени недоследности во зависност од работната сила вклучена во различни аспекти на неговото производство. Забавниот аспект на автомобилот е нагласен кога Данам открива дека резервната гума е наведена како безбедносна карактеристика при судар (тоа го имаше и во видеото на Биг Кар). Тој потоа надополнува дека таа се наоѓа во просторот на моторот, што всушност не е безбедно место!
И покрај малиот 1,1-литарски мотор кој генерира само 55 КС, GVS произведува карактеристичен звук на патот, кој Лено го спореди со зарипнато грло. Изненадувачки, над 142.000 возила биле продадени во САД, а вкупно биле произведени над 800.000 југовци. Кога Лено го презема воланот, малиот GVS им привлече внимание на обожавателите кои застануваа и покажуваа кон него.
Впечатоци од возењето
Лено беше пријатно изненаден, истакнувајќи дека автомобилот „добро вози за парите“. Внатрешноста е базична, со минимални копчиња за основни работи како светла, трепкачи и слично. Дури и при 130 километри на час на автопат, како што потврдува Данам, Југото добро се држи.
Иако Југото може да има своја привлечност, неговиот успех веројатно бил попречен од конкуренцијата во тој период. Кога бил увезен, на пазарот имало автомобили со слична цена, но со подобри карактеристики.
Yugo GVS во 2023/24 година
Во 2023 година, моделите на Yugo GVS од 1986 до 1990 година во САД обично достигнуваат цена од околу 10.000 долари според Classic.com. Највисоката забележана продажба е 12.000 долари, што укажува на постоечки пазар за овие возила.
Затоа, како што заклучивме и во претходниот текст – не го продавајте вашето Југо, чувајте го и некогаш можеби ќе заработите добри пари од него!